آخر نكتة

مش عارفة ايه اللي فكرني بالحدث ده دلوقتي بس اهه افتكرته واللي كان كان

بعد الانتخابات الأخيرة نزلت الجامعة ولقيت اتنين دكاترة من القسم بيتكلموا عن الانتخابات الأخيرة وأحدهم وهو ذو منصب في القسم بيقول انها انتخابات نزيهة وتعكس تطور وتحضر البلد

فرحت رديت عليه في مكتب القسم وطبعا انا كده هبقا من المغضوب عليهم ولا الضالين آآآآآآآآآآآآآآآآآآآآآمين ف القسم

وقلت لو ازاي تطور يا دكتور وفيه ضرب نار؟سين سؤال؟

راح الدكتور رد عليا وطبعا مقالش ان دي بجاحة مني لاني بناقشه

بس عداها ليا ودا كرم اخلاق طبعا منو

وقال لي ان الدول المتقدمة كلها بيحصل فيها كده يقصد بكده "ضرب النار يعني"فرحت سكت وقلت انا مش خبيرة سياسية كل اللي اعرفه عن الانتخابات انها انتخابات يحصل بقا فيها ضرب نار يحصل ضرب علي القفا مش مهم

وقد كان الدكتور سالف الذكر مبسوط من الانتخابات سالفة الذكر

ودلوقتي بس افتكرت او جه علي بالي ان طبيعي قوي ان الدكتور يقول عليها انها انتخابات كويسة وبتعكس تقدم البلد مش هو تبع النظام،فبديهي جدا يقول كده!!!!!!

وسواء كان الدكتور محق ف ان البلاد المتقدمة بيحصل فيها كده"ضرب النار"أو غير محق لكن موقفه كان مؤيد للانتخابات اللي وصفت بعد كده بالمهزلة والمسخرة وبحاجات كتييييييييرة جدا معروفة لكل الناس وغير كده كانت القشة اللي قصمت ظهر البعير

انا مبسوطة اني افتكرت الموقف ده دلوقتي واني جاتني جرأة مناقشة حد ف الجامعة ف السياسة واني اكون معارض كمان ودا رجل ذو منصب واللي افتركته حالا انو مش بس ف القسم هاااااااااااااااااا دا ف الكلية كمان.

اما بصدد العنوان وهو آخر نكتة انا بقصد بيه كلام السيد الدكتور عن ان الانتخابات الاخيرة كانت نزيهة وان كووووووووووول الدول المتقدمة بيحصل فيها كده

بس نكتة بايخة قوي ................ من وجهة نظري علي الأقل